Февраль 29-туӊ хүнүнде «Тыва улустуӊ оюннары» деп республика чергелиг маргылдааны Кызылдыӊ 9 дугаар Гимназиязында «Этнопедагогиктиг курлавыр төвүнге» Национал школа хөгжүдер институттуӊ этнопедагогиктиг шинчилелдер лабораториязыныӊ ажылдакчылары, Эрзин кожууннуӊ Бай-Даг ниити өөредилге чериниӊ башкылары удуртуп эрттирген.
Аӊаа 4 аӊгы кожуундан: ыраккы Мөӊгүн-Тайганыӊ немелде өөредилге чери, Өвүр кожууннуӊ Дус-Даг ниити өөредилге чери, Бии-Хем кожуундан чыынды команда, Кызылдыӊ дугаары 2 ниити өөредилге черинден шыырак дээн командалар киришкен. Ниитизи-биле 45 уруг, 12 башкы хаара туттунган. Аът шалбалаары, тевек тевери, даалы, буга-шыдыраа болгаш кажык оюнунуӊ хевирлери: бодалажыры, кажык адары, сагалап ойнаары, аът чарыштырары деп хевирлерни ойнаан. Аът шалбалаарынга Бии-Хемден Хорбаа Ай-Херел шылгарап, бирги черни алган. Тевек теверинге Доржу Отчугаш 341 катап тепкеш, улусту кайгаткан. Даалы, буга-шыдыраа оюннарынга Мөӊгүн-Тайга кожуундан «Кажыктар» командазы шылгарап, 1-ги черни алган. Кажык оюнунуӊ хевирлерин кайы-даа кожуунда нептереӊгей ойнап турары көскү деп болур. Чидиг демисешкен түӊнелинде Мөӊгүн-Тайга кожуундан келген «Кажыктар» командазы тиилекчи болуп, дамчып чоруур кубокту алгаш, келир чылын «Тыва улустуӊ оюннары» деп маргылдааны эрттирер эргени чаалап алган. Ийиги черге Өвүрнуӊ «Хуулгаазын кажыктар», үшкү черни Бии-Хемниӊ чыынды «Найырал» командазы, дөрткү черни Кызылдыӊ дугаары 2 ниити өөредилге чери алган. Келген командалар шаӊнал бижиктерни, өртектиг белектерни тус-тузунда алганнар. Оюннарны түӊнеп турар аразында олар Эрзин, Тере-Хөл кожууннарда делгереӊгей ойнап турар «Панчык» оюнун көргүзүп, мастер-классты эрттиргеннер.
Чылдан чылче өөреникчилерниӊ тыва оюннарга сонуургалы улгадып, национал оюннар ойнаарынга мергежип турарын демдеглевес арга чок. Мөөрейниӊ шииткекчилери эрткен чылгы тиилекчилер Эрзин кожууннуӊ Бай-Даг ортумак школазыныӊ башкылары болгаш өөреникчилери шыырак белеткелдиин көргүскеннер.
Тыва оюннарны сайзырадырынга улуг үлүг-хуузун киириштиргени дээш Эрзин кожууннуӊ Өөредилге килдизиниӊ даргазынга, Бай-Даг ортумак школазыныӊ директорунга база коллективинге, өөреникчилеринге, киржип келген командаларныӊ кежигүннеринге Национал школа хөгжүдер институттуӊ мурнундан өөрүп четтиргенивисти илередип тур бис.
