Хуралды Тыва Республиканың өөредилге яамызының сайыдының оралакчызы Юрий Монгуш удуртуп эрттирген. Ажылчын хуралга ортумак өөредилге черлериниң удуртукчулары болгаш оралакчылары, Национал школа хөгжүдер институттуң эртем ажылдакчылары филология эртемнериниң доктору Мира Бавуу-Сюрюн, педагогика эртемнериниң кандидады Алевтина Шаалы, филология эртемнериниң кандидады Алимаа Херел киришкеннер.
Национал школа хөгжүдер институттуң кылганы чижек өөредилге программалары студентилерниң дыл, литература, культура, аас болгаш бижимел чугаа сайзырадылгазы, ёзу-чаңчылдар талазы-биле билиглерин бедидеринче кол кичээнгейни угландырып турар. Республиканың ортумак профессионал өөредилге черлеринге 1 дугаар курска «Төрээн (тыва) дыл», 2 дугаар курска «Өг-бүле педагогиказы» деп эртемнерни 36 шакка чаа өөредилге чылында башкылап эгелей берген.