2024 чылдыӊ февраль 13-те эртенгиниӊ 9.00 шактан кежээкиниӊ 20.00 шакка чедир Тыва Республиканыӊ өөредилге яамызыныӊ удуртулгазы-биле Тыва национал школа хөгжүдер интституттуӊ этнопедагогиктиг шинчилелдер лабораториязыныӊ ажылдакчылары Республиканыӊ өөреникчилеринге, ортумак өөредилге черлериниӊ сургуулдарынга болгаш идепкейжи чон аразынга ыдыктыг байырлалывыс Шагаага тураскааткан «Шагааныӊ сүзүктери» деп онлайн форматка https://vk.com/irnsh?w=wall-113735841_8844 этнокультурлуг диктантыны эрттирген. Диктантыныӊ айтырыгларын Тываныӊ гуманитарлыг болгаш социал-экономиктиг тускай шинчилелдер институдунуӊ 2015 чылда үндүргени «Шагааныӊ дөзү болгаш ёзу-чаӊчылдары», Г. Сундуйнуӊ «Шагааныӊ сүзүктери» деп номнарга үндезилеп тургускан.
Диктантыга ниитизи-биле 4676 кижи киришкен. Оларныӊ аразындан 2551 кижи 7-18 харга чедир школачылар, сургуулдар болган. 19-76 харга чедир кижилерниӊ саны – 2252.
Улуг-Хем кожуун эӊ-не идепкейлиг болган – 483 кижи. Кожууннар аайы-биле түӊнээрге мындыг: Эрзин кожуун – 446, Бии-Хем кожуун – 250, Өвүр кожуун – 246, Сүт-Хөл кожуун – 241, Кызыл кожуун – 187, Каа-Хем кожуун – 178, Бай-Тайга кожуун – 129, Тожу кожуун – 125, Чеди-Хөл кожуун – 124, Тес-Хем кожуун – 101, Таӊды кожуун – 93, Чаа-Хөл кожуун – 93, Мөӊгүн-Тайга кожуун – 72, Чөөн-Хемчик кожуун – 71, Барыын-Хемчик кожуун – 57, Тере-Хөл кожуун – 17. Кызыл хоорайдан – 1631, Ак-Довурак хоорай – 87. Тодаргай кожууннуӊ орнунга Тыва деп айыткан киржикчилерниӊ саны 43 болган. Саха Якутиядан 2 кижи киришкен.
Диктантыга бодунуӊ билиин хынаан киржикчилер дараазында баллдарны ажылдап алган: 90 балл – 10 кижи, 85 балл – 59, 80 балл – 137. 4435 киржикчи ортумак баллдарга харыыны берген. 5-10 баллга 29 кижи харыылаан. 4 кижи бүрүткелди эрткеш, айтырыгларга харыы бербээн.
Кандыг-ла-бир чылдагаан-биле электроннуг сертификат бижиктерин ап шыдавайн барган киржикчилер дараазында почтаже izd_irnsh@mail.ru долу ат-сывын, кожуунун, электроннуг почтазын айыткаш ап болур.
Тыва улустуӊ национал байырлалы Шагааныӊ сүзүктеринге хамаарышкан диктантыга идепкейлиг киришкениӊер дээш Национал школа хөгжүдер институттуӊ мурнундан четтиргенивисти илереттивис!