Ийи дугаар эртип турар федералдыг мөөрейге Тыва Республика бир дугаар киржип турар. Мөөрейниң регионалдыг чадазын Тыва Республиканың өөредилге яамызы организастап турар. Эрттирикчизи – Национал школа хөгжүдер институт. Регионалдыг чадада республиканың кожууннарындан шилиттинген 12 башкы болгаш 9 чаштар садтарында төрээн дыл эрттирип турар кижизидикчилер киржип келген.
Байырлыг ажыдыышкынга Тываның өөредилге яамызының сайыдының бирги оралакчызы Владимир Монгуш сөс ап, мөөрейниң киржикчилеринге чедиишкиннерни күзээн. Республиканың тыва дыл болгаш чогаал башкыларының мөөрейиниң ажыдыышкынын Кызылдың 9 дугаар гимназиязының өөреникчилери чараш оюн-тоглаазы-биле каастаан.
Мөөрей Кызыл хоорайның 9 дугаар гимназиязынга, 17 дугаар «Салгал» аттыг чаштар садынга, Х.Чургуй-оол аттыг 16 дугаар лицейге 3 хүннүң дургузунда болуп эртер.
Бөгүн киржикчилер «Методиктиг мастерская» деп мөөрейниң бирги кезээнге киржир. Даарта уругларга кичээлдерин эрттирер. Мөөрейниң түңнелдерин апрель 27-де түңнеп, тиилекчилерни тодарадыр.
