Ук хемчеглерни Национал школа хɵгжүдер институт болгаш Кызыл хоорайның 17 дугаарлыг «Салгал» уруглар сады демнежип эрттирген. Аңаа немей ук уруглар сады бодунуң девискээринде кадарчы, муңчу ɵг-бүледен белекке алганы тыва ɵгнү тип, уругларга тыва дыл кичээлдерин болгаш улусчу ужурларны өөредир өгнү байырлыг байдалга ажыткан.
Уруглар садының башкылары болгаш ада-иелери келген аалчыларга тыва чемнер делгелгезин сонуургадып кɵргүскен. База ол ышкаш Россияда чарлаттынган Өг-бүле чылын 10 ажы-төлдүг Чайзат биле Чимис Ховалыгларның өг-бүлези байырлыг байдалга ажыдарынга төлептиг болганнар.
Үстүнде айыткан тɵлевилел камгалалының шииткекчилери кылдыр Тыва Республиканың ɵɵредилге яамызының ниити ɵɵредилге килдизиниң специализи Урана Допул, филология эртемнериниң кандидады, Национал школа хөгжүдер институттуң директору Елена Куулар, педагогика эртемнериниң кандидады, ТР-ниң Улустуң башкызы, ТывКУ-нуң педагогика кафедразының доцентизи, НШХИ-ниң этнопедагогика лабораториязының башкарыкчы эртем ажылдакчызы Алевтина Шаалы, НШХИ-ниң ном парлаар килдистиң кол редактору Людмила Ооржак база НШХИ-ниң улуг методизи Альбина Монгуш ажылдааннар. Уруглар садының эргелекчизи Лада Хертектиң удуртулгазы-биле коллективтиң ада-иелер-биле ажылының сырый харылзаазы кɵстүп турарын шииткекчилер онзалап демдеглээн.
Шупту киржикчилер Шаңнал бижиктерни болгаш тыва чемнерни белекке алганнар.
