Бөгүн, июнь 10-нуң хүнүнде Россияның эртемнер академиязының Дыл эртеминиң институдунуң дылдар кадагалаар төвүнүң удуртукчузу, филология эртемнериниң кандидады Аржаана Сюрюн Национал школа хөгжүдер институттуң коллективи-биле ужуражылга эрттирген.
Аржаана Александровна ажылчын сургакчылаашкынының үезинде республиканың аңгы-аңгы кожуун-суурларынга барып, тыва дылдың амгы үеде байдалын шинчилеп турган аргаларын институттуң ажылдакчылары-биле үлешпишаан, бодунуң эскериглерин чугаалап, санал-оналын киирген.
Май айда Кызылдың школачыларының аразында тыва дылдың ажыглалын шинчилээр ажылды Национал школа хөгжүдер институттуң ажылдакчылары кылган турган. Ук шинчилелдерниң көргүзүглерин болгаш түңнелдерин тыва филология лабораториязының эргелекчизи Чойгана Монгуш допчузу-биле таныштырган.
Ниитизи-биле, ужуражылга үезинде тыва дылды хөгжүдериниң болгаш улус-чон аразынга ону нептередириниң дугайында чидиг айтырыгларны чугаалашпышаан, моон-даа соңгаар сырый холбаалыг кады ажылдаарын дугуржуп алганнар.
