2026 чылдың октябрь 16-да «Победа» аттыг спорт болгаш культура төвүнге «Эртем болгаш технологияның 10 чылы» деп федералдыг төлевилелдиң негелдезин ёзугаар «ЭРТЕМ 0+» деп делегей чергелиг шуулган болуп эрткен. Өөредилге черлериниң аңгы-аңгы эртем шөлчүгештериниң аразындан уруглар садтарының делгелгелери онзаланып ылгалып турган. Бичии шинчилекчилер, оларның ада-иелери, башкылары эртем делегейинче баштайгы базымнарының түңнелдерин – өңгүр, чараш кылдынган хөй янзы ажылдарын – делгээн.
Улуг хемчегге дараазында уруглар садтары киришкен:
Кызыл хоорайның 21, 40 дугаарлыг садтары;
Каа-Хем суурнуң «Звездочказы»;
Чадаананың «Хээлери”;
Хандагайтының «Чечек», «Хүнчүгеш» болгаш
Солчурнуң «Салгакчызы»;Шагаан-Арыгның «Бодаган», «Солнышко» садтары.
Олар шуптузу аңгы-аңгы угланыышкыннарлыг төлевилелдерни боттандырып, чаштарның эртемге сонуургалын оттуруп, шудургу ажылдап турарлар.
Шуулганга Тыва Республиканың Баштыңы Владислав Ховалыг, Дээди Хуралдың (парламентиниң) даргазы Каң-оол Даваа база Тыва Республиканың Чазааның даргазының оралакчызының хүлээлгелерин күүседип турар – Тыва Республиканың Өөредилге яамызының сайыды Алексей Сазан-оол чаштарның ажылдарын улуг сонуургал-биле көргеннер. Аңгы-аңгы назы-харлыг уругларның баштайгы эртем ажылдарын
хүндүлүг аалчылар сонуургап, бедии-биле үнелээн.
Национал школа хөгжүдер институт биле «Хээлер» аттыг уруглар садының «Эртемни – чаштарга» деп губернатор төлевилелин боттандырары-биле демнежип ажылдап турар. Оларның кады ажылдажылгазының түңнели болур
«Уруглар-биле дуржулга» деп номчугаштарын келген аалчыларга белек кылдыр сунган.
Тыва Республиканың школа назыны четпээн уруглар өөредилгезиниң хүндүлүг ажылдакчызы, «Хээлер» аттыг уруглар садының эргелекчизи Ульяна Ховалыг ук төлевилелди чедимчелиг боттандырары-биле улуг ажылды чорудуп турарын демдеглевес арга чок.
“Хээлерниң” бо бүгү чедиишкиннери уруглар садының өөредилге-кижизидилге талазы-биле ажыл-чорудулгазындабашкылар, уруглар болгаш ада-иелерниң аразында кады ажылдажылганың үлегер-чижээ болуп турар.
Эртемче сонуургалды оттурары-биле бөдүүн чижектерден эгелээш чоорту нарынынче шилчип тургаш амыдыралда болуп турар чүүлдерни уругга тайылбырлап, айтып бээри чугула дээрзин коллектив кончуг эки билир.
Республиканың уруглар садтарынга чаштарны эртем оруунче хаара тудар ажыл-ижинге ак орукту болгаш чогаадыкчы чедиишкиннерни күзедивис.
