ЧЕЧЕКТЕР
Төрүттүнген хүнүн сактырда,
Төрел өңнүүн уткуп, үдээрде
Сунчур, тутчур эң-не үнелии
Чурттуң шилээ, холдуң белээ –
Чечектер, чараштар,
Сеткил сөзү чечектер.
Байыр, наадым болган хүннерде,
Бадылажыг улуг доюнга
Алгаг-йөрээл чондан алырда,
Акы-дуңма чаагай белээ –
Чечектер, чараштар,
Сеткил сөзү чечектер.
Ынак чериң уян сеткили –
Ырлап-хөглээн уран сөстери,
Өңгүр чараш, чыткыр чаагайы,
Өртээ турбас улуг белээ –
Чечектер, чараштар,
Сеткил сөзү чечектер.
ХОМУДАЛ
Он сес хар-даа четпейн чорааш,
Олурушпаан болурумгай.
Эртем-угаан, өөредигниң
Эжиин ажып алырымгай.
Часкы чечек шала каткаш,
Чайның айын көрбээн ышкаш,
Эрте чаштан өгленгештиң,
Эки чүве көрбейн калдым.
Эрте чаштан эдеришкен
Эжим меңээ хорадава,
Кеземчени сагынмышаан,
Келир чашка чагыг берээл.
ЧЫМЧАК САЛГЫН
Бажыңнарның артыы чарыы
Мажалыкка үне берген
Баштайгы-ла кежээвисти
База катап сактып келем.
Кожаланчып олургаштың,
Холдарывыс тутчуп алгаш,
Чугаалашкан чүвевисти
Сувуразын утпайн чор мен.
Сындан каккан чымчак салгын
Сыйбап эртип турбадыве.
Сылдыс, шолбан кырывыстан
Чырыткылап турбадыва.
Эриннерниң ошкашканы
Эътти-ханны тудуштурган.
Оран-чурттуң чылыг холу
Ол хүн мени куспактапкан.
