Тываның Улустуң чогаалчызы С.С. Сүрүң- оолдуң 100 харлаанынга тураскааткан “Сат номчулгалары” деп ТывКУ болгаш НШХИ-ниң эрттирип турары эртем-практиктиг конференция бөгүн ажылын эгелээн

Конференция Тыва дыл хүнүн республикага байырлап эрттирериниң декадазының бир чугула хемчээ бооп турар. “Сат номчулгаларының” пленарлыг кезээнге чалаттырган хүндүлүг аалчылар: Чуваш республиканың чогаалчызы Владимир Бахмисов , РФ-тиң болгаш ТР-ниң Алдарлыг артизи Анзат Куулар, ТР-ниң культуразының алдарлыг ажылдакчызы, РФ-тиң Чогаалчылар эвилелиниң кежигүнү Лидия Иргит – киришкеннер.
С. Сүрүң- оолдуң басняларын, шүлүктерин, сөзүнге бижээн ырларны ТывКУ-нуң сургуулдары болгаш В. Көк-оол аттыг национал хөгжүм-шии театрының артизи Анзат Куулар күүсеткеннер.

Пленарлыг хуралга филология факультединиң башкылары ф. э. к. А. М. Соян, ф. э. к. М. А. Күжүгет, НШХИ-ниң директорунуң оралакчызы Эрик Норбу илеткелдерни кылган. “Тыва дыл, чогаал башкыларының ассоцияциязының” даргазы М.Н. Ооржак юбиляр дугайында чогаалчыларның солун сактыышкыннары-биле үлешкен.