Дөрт дугаар чыл уламчылап турар федералдыг олимпиадага Тыва Республиканыӊ өөреникчилери бөгүн киржип, тыва дыл болгаш чогаал эртемнеринге билиин шылгап киржип турар. Ук хемчегниӊ байырлыг ажыдыышкыны күрүне университединиӊ филология факультединге болуп эрткен. Аӊаа республиканыӊ школачылары болгаш тыва дыл, чогаал башкылары, университеттиӊ болгаш өөредилге яамызыныӊ төлээлери киришкен.
Тываныӊ күрүне университединиӊ өмүнээзинден олимпиаданыӊ координатору, Дээди өөредилгеге белеткээр институттуӊ директору Урана Даржа илеткел кылгаш, үш чыл дургузунда федералдыг хемчегге Тываныӊ школачыларыныӊ киржилгезиниӊ түӊнелдери-биле болгаш Россияда төрээн дылдарныӊ амгы үеде байдалы-биле чыылганнарны таныштырган. Бо чылын федералдыг олимпиадага муӊ чээрби ажыг өөреникчилер киржип келген.
Байырлыг ажыдыышкынга университеттиӊ өөредилге болгаш ооӊ шынарыныӊ талазы-биле проректору Салимаа Ховалыг, Тываныӊ өөредилге яамызыныӊ Национал школа хөгжүдер институдунуӊ директору Елена Куулар, оралакчызы Эрик Норбу сөс ап, төрээн дылды камгалап, ону сайзырадырыныӊ чугулазын демдеглеп, өөреникчилерге чедиишкинниг киржирин күзээннер.
Байырлыг ажыдыышкынныӊ соонда олимпиада ажылын эгелээн, а Национал школа хөгжүдер институт башкылар-биле тыва дылдыӊ болгаш чогаалдыӊ башкылаашкыныныӊ айтырыгларын чугаалашкан. Ооӊ түӊнелинде тыва чогаал эртемин башкылаарыныӊ талазы-биле немелде билиг бедидер курстарны март айда эрттирерин дугурушканнар.
