Бөгүн Тываның күрүне лицейинге Өөредилге яамызының республика чергелиг өөредилге албан черлериниң аңгы-аңгы эртемнер башкылары, методистери арга-дуржулга солчуру-биле методиктиг үнүүшкүннү чоруткан.
Национал школа хөгжүдер институттуң директору Елена Куулар, Тываның кадеттер корпузунуң тыва дыл, чогаал башкызы Лидия Ооржак ук лицейниң тыва дыл башкызы Виктория Монгуштуң 7-ги класстың төрээн дылын билбес өөреникчилеринге эрттиргени «Өг – тываларның чурттаар оран-савазы» деп темага тураскааткан тыва дыл эртеминден дашкаар ажыл-чорудулга кичээлинге олурушкан.
Кичээл соонда методист башкылар лицейниң удуртулгазы-биле ажылчын сайгарылганы кылып тура, 5-8 класстарның ук категорияның өөреникчилеринге кичээлден дашкаар ажыл-чорудулга кичээлдериниң чаңгыс аай программазын ажылдап кылыры чугула-дыр деп түңнелди үндүрген. Ол ышкаш шак мындыг кичээлдерниң кол сорулгазынга уругларның тывалап чугаалаарын чедип алыры чугула дээрзин чугаалашкан. Ынчангаш тыва дыл башкылары бо хевирниң кичээлдеринге кичээнгейни өөреникчилерниң аас чугаазын сайзырадырынга таарымчалыг байдалдарны тургузарынче, тыва дылды хүн бүрүнүң амыдыралынга ажыглап билир кылдыр чаңчыктырарынче угландырар болза эки деп демдеглээннер.
ъ
