Тыва Республиканыӊ Баштыӊыныӊ чанында Дыл политиказыныӊ талазы-биле күрүне чөвүлелиниӊ ээлчеглиг хуралы болуп эрткен. Чөвүлел даарта демдеглээривис тыва дыл хүнүнге уткуштур чыглып, хуралдың киржикчилери эрткен чылын хүлээп алдынган «Тыва Республикага 2024-2033 чылдарда тыва дылдыӊ хөгжүлдезинге күрүне деткимчезиниӊ эчис сорулгалары» деп документиниӊ күүседилгезиниӊ дугайында чугаалашкан.
Эчис сорулгаларныӊ өөредилге болгаш эртем адырында күүселдезиниӊ баштайгы түӊнелдери-биле Тываныӊ өөредилге яамызыныӊ сайыдының хүлээлгезин күүседип турар Ренат Ооржак таныштырган. Тыва дыл башкыларын белеткеп турарыныӊ дугайында немелде илеткелди Тываныӊ күрүне университединиӊ филология факультединиӊ деканы Надежда Сувандии номчаан.
Тыва дылдыӊ ниитилел амыдыралында ажыглалыныӊ талазы-биле чоруткан шинчилелдерниӊ түӊнелдериниӊ дугайында Тываныӊ гуманитарлыг шинчилелдер институдунуӊ директору Вячеслав Март-оол болгаш эртем ажылдакчызы Чойган Ондар илеткээннер.
Ниитизи-биле Эчис сорулгаларныӊ ужур-утказыныӊ, күүселдезиниӊ болгаш ниитизи-биле тыва дылдыӊ амгы үеде байдалыныӊ дугайында бодалдарын Чөвүлелдиӊ кежигүннери болгаш бөгүнгү киржикчилери филология эртемнериниӊ доктору Каадыр-оол Бичелдей, филология эртемнериниӊ кандидады Уран Донгак, Тыва үндезин культура төвүнүӊ директору Игорь Көшкендей, чогаалчы, журналист Александр Шоюн олар илереткеннер.
Хуралдыӊ даргазы, Тываныӊ Баштыӊы Владислав Ховалыг чоокта чаа үндүргени эге школага тыва дыл номнарын парлаарының дугайында шиитпириниӊ күүселдезиниӊ дугайында айтырыгны Өөредилге яамызынга салган. Айтырыгга харыыны Национал школа хөгжүдер институттуӊ директорунуӊ оралакчызы Эрик Норбу берген: «Тываныӊ Баштыӊыныӊ шиитпирин улуг өөрүшкү-биле хүлээп алгаш, даалганы боттандырары-биле ажылдарны шалыпкын чоруткаш, саӊ-хөө айтырыгларын шиитпирлээш, «Офсет» деп типография-биле күрүне керээзин белеткээн бис. Керээниӊ акшаландырыышкыныныӊ ниити түӊү 11 млн ажыг рубль, ниитизи-биле республиканыӊ школаларынга 38 муӊ ажыг номнарны парлааш, оларны четтикпейн манап турар эге школаның өөреникчилеринге дамчыдып бээр бис».
