Тыва дылдың ажыглалы калбарып-ла турар болза, ооң келир үеде сайзыралынга, хөгжүлдезинге бо чүүл дөгүм болуп, дылдың чиде бээриниң айыылын чайгаар чайладып болур. Ылаңгыя массалыг медээ чепсектери тыва дылды хөй ажыглаарга, чон ону көрүп, дыңнап, үлегер-чижек кылдыр ажыглап эгелээр болгай.
«Тыва 24» телеканалы тыва дылда медээлерниң үндүрүлгезин чорудуп эгелээнин улус-чон улуг сонуургал болгаш өөрүшкү-биле хүлээп алганнар. Бо эгелээшкин тыва дылдың сайзыралынга аажок улуг салдарны чедирер. Черле ышчаш ук телеканал тыва дылда янзы-бүрү темаларлыг дамчыдылгаларны кылып, чогаадыкчы угланыышкын-биле ажылдап турарын онзалап демдеглевес арга чок. «Чечен чогаалдың ак өргээзинде» деп дамчыдылга бо хүннерге чедир уламчылап турар.
«Тыва 24» телеканалының чаа эгелээшкинин деткип, моон-даа соңгаар тыва дылга аңгы-аңгы темаларлыг дамчыдылгаларны кылып чорударын манавышаан, чогаадыкчы коллективтиң ажыл-ижинге чедиишкиннерни күзедивис!
