Бөгүн Национал школа хөгжүдер институттуң ажылдакчылары Кызылдың 9 дугаар гимназиязында немелде өөредилге төвүнүң улусчу педогогика башкылары-биле демнежип алгаш, Кызыл хоорайның школаларының аразынга «Улустуң аас чогаалының тергииннери» деп мөөрейни эрттиргеннер. Ук хемчег «Эртемни – уругларга» губернатор төлевилелиниң иштинче кирип турарын сагындыраал. Мөөрейге 9 аңгы школадан өөреникчилер киришкен.
Мөөрейниң киржикчилери улустуң ырларын ырлап, кожамыктап, тывызыктажып, чеченнежип база тыва тоолдарны шиижидип ойнап тургаш, аразында адааннашканнар.
1-ги черни Кызылдың 20 дугаар школазы чаалап алган.
2-ги черге Кызылдың 12 дугаар школазы төлептиг болган.
3-кү черни Кызылдың 21 база 17 дугаар школалары үлешкеннер.
Оон аңгыда уруглар аас чогаалынга билиин хынап, викторина айтырыгларынга база харыылаан.
1-ги черни Монгуш Александра (17 дугаар школа), 2-ги черни Монгуш Даяна (20 дугаар школа), 3-кү черни Баазаңай Чыжыргана (21 дугаар школа) алганнар.