Эргим чаңгыс чер-чурттугларывыс! Тыва дылдың эдилекчилери! Өөредилге яамызының Национал школа хөгжүдер институдунуң өмүнээзинден бүгү чонувуска Тыва дыл хүнү-биле изиг байырны чедирип тур бис!
Кижилерниң аразында харылзажырының эң-не чугула чепсээ – дыл. Дылдың дузазы-биле ниитилелдиң бүгү адырлары сайзырап, кижилер боттарының иштики делегейин, өөрүшкүзүн, аас-кежиин, магадалын, сарынналып, уяраан сагыш-сеткилин илередип чоруурлар.
Делегейниң өске дылдары-биле бир дөмей, бистиң тыва дылывыс бурун шагдан тура, салгалдан салгалче өгбелеривистиң хемчээп четтинмес байлак аас чогаалы-биле дамчып келгеш, бо үеде өөредилге-кижизидилгениң, эртемниң, албан-херектиң, парлалганың, чечен чогаалдың дылы болуп сайзыравышаан, Тыва Республиканың күрүне дылдарының бирээзи кылдыр быжыг туружун ээлеп турар.
Улустуң чогаалчызы Александр Даржайның тыва чоннуң төрээн дылынга албан-езунуң хүнүн тураскаадыр дугайында эгелекчи саналы-биле 2016 чылдан эгелеп, ноябрь айның 1-ги хүнүн бистиң республикада тыва дыл хүнү кылдыр доктааткан.
Хүндүлүг чогаалчылар, төрээн дыл болгаш чогаал башкылары, эртем ажылдакчылары, журналистер болгаш бүгү чаңгыс дыллыг төрел чонувус! Силер бүгүдеге бөгүн он дугаар демдеглеп эрттирип турарывыс Тыва дыл хүнү-биле изиг байырны, сагыш-сеткиливистиң чараш чечектерин сөңнеп тур бис!
Бо байырлалды дыл эртемнериниң доктору Шулуу Саттың «Төрээн дылымга йөрээл» деп проза-шүлүү-биле алгап тур бис!
«Улуг-Хемниң агымы дег күштүг, ак-көк Тывавыстың дээри дег арыг, бора хектиң эдери дег өткүт, алдын-сарыг сыгырганың ырлаары дег элдептиг төрээн дылым. Сенде хову-шөлдерниң делгемнери, тайга-таңдыларның бедиктери, кылаң хөлдерниң оожум-топтуу, оран-делегейниң оът-сигениниң айдызы, аң-меңиниң алгы-кышкызы сиңген.
Өргүн-көвей улустарның дылдарының аялгазының аразынга мөңге шагда хомустуң үнү болуп чаңгыланып чор, өлчей-кежиктиг, хайыралыг төрээн дылым!».