Декабрьның 13-түң хүнүнде «Уругларны тыва чоннуң ёзу-чаңчылдары-биле таныштырары» деп республика чергелиг өөредиглиг семинар Кызыл хоорайның 27 дугаарлыг «Угулза» аттыг уруглар садынга болуп эрткен. Улуг сонуургал-биле 66 кижизидикчи болгаш аңгы-аңгы угланыышкынның специалистери келген. Семинарның башкыларынга Тываның өөредилге яамызының ниити билиглер килдизиниң даргазы Светлана Монгуш байырны чедирген.
Семинарның теориялыг кезээнге Делегей чергелиг школа назыны четпээн уругларның өөредилге академиязының психология эртемнериниң кандидады Мария Лилюхина, Өөредилге яамызының ниити билиглер килдизиниң специализи Урана Допул, Национал школа хөгжүдер институттуң улуг методизи Альбина Монгуш, Кызыл хоорайның 17 дугаарлыг “Салгал” аттыг уруглар садының эргелекчизи Лада Хертек, Кызыл хоорайның 12 дугаарлыг “Кежик” аттыг уруглар садының немелде өөредилге салбырының башкызы Шолбан Хомушку база Чадаана хоорайның “Хээлер” аттыг уруглар садының психолог башкызы Чойганмаа Сат солун болгаш ажыктыг лекцияларны номчаан.
Практиктиг кезээнге ук уруглар садының тыва дыл башкызы Сайсуу Даргын-оол болгаш өске-даа дуржулгалыг башкылар боттарының билии-биле келген башкылар-биле үлешкеннер. Ылаңгыя тыва дыл башкызы Сайсуу Даргын-оолдуң «Үш чүүл эртемниг оол» деп тыва улустуң тоолунга үндезилээн кичээли кайгамчык болганын келген башкылар демдеглээн.
Республиканың аңгы-аңгы кожууннарындан келген башкылар чаа-чаа билиглер-биле чепсегленген дээр болза артык эвес.