Мөөрейге 8 аңгы кожуун (Бай-Тайга, Барыын-Хемчик, Чөөн-Хемчик, Кызыл кожуун, Мөңгүн-Тайга, Өвүр, Таңды болгаш Чеди-Хөл) база 2 хоорайдан (Кызыл, Ак-Довурак) 17 сценарий киириштирген. Хылбык дою, келин айтырары, куда, мугур хар харлаан болгаш чаа кыштаг, чаа бажың, ча адарынга, хүреш дээн ышкаш байырлалдарныӊ сценарийлерин авторлар чоруткан. Мөөрей “Бичии чаштарга хамаарышкан байырлалдар”, “Кудага хамаарышкан байырлалдар”, “Мугур хар харлаан амы-хууда байырлалдар” база “Ниити байырлалдар” деп 4 аңгы номинацияга эрткен. Ооӊ сорулгалары:
- Тыва дылды кадагалаары, сайзырадыры болгаш нептередири, уттундурган тыва сөстерже кичээнгейни угландырары;
- Амгы үениң бот-тывынгыр салым-чаяанныг чогаалчыларын, сценарий бижикчилерин илередири, оларны деткиири;
- Аныяк өскенни хостуг үезинде чогаал ажылынче чаңчыктырары, өзүп орар салгалдарга үлегерлиг болуп, оларны шын кижизидери;
- Эзиртир суксун чокка эртирер өг-бүлениң байырлалдарын чон аразынга нептередири, бедик утка-шынарлыг сценарийлерни чонга чедирери.
Мөөрейге киириштирген сценарийлерниӊ дылынга хамаарыштыр институттуӊ сагындырыгларындан дараазында каш чижекти киирип болур:
- оюун оя, чигиин чире (оюн оя, чириин чире);
- чөшпээрел (чөПшээрел), каспырылга (каПсырылга);
- артынчыларда ажык үннерниӊ аяннажылгазы сагыттынмайн турар: күзээр-дыр, чүүлдер-дыр (күзээр-дИр, чүүлдер-дИр), кежии дир (мында шын бижээн-даа болза, дефис чокка бижип турар дээн ышкаш) “Декей-оо”-че (“Декей-ооже”);
- биеде (биеЭде).