Шылгараңгай түрколог, филология эртемнериниң доктору, профессор Б.И. Татаринцевтиң 85 харынга уткуштур регионалдыг эртем-практиктиг конференция Тыва Республиканың Чазааның чанында Тываның гуманитарлыг болгаш социал-экономиктиг тускай шинчилелдер институдунуң базазынга 3 аңгы эртем секциялары болуп эрткен.
«Школага болгаш дээди өөредилге черинге тыва дылдың башкылаашкынының чугула айтырыглары» деп 3 дугаар секцияны Тыва Республиканың Өөредилге яамызының «Национал школа хөгжүдер институду» болгаш ТывКУ-нуң тыва филология болгаш ниити дыл эртеминиң кафедразы удуртуп эрттирген. Ниитизи-биле 12 илеткелчиниң арга-дуржулгазын, арга-сүмезин киржикчилер сонуургал-биле дыңнаан. Секцияның ажылынга көдүрттүнген кол айтырыгларга эге школаның «Үжүглел» номунга хамаарышкан саналдарны, тыва дыл кичээлдеринге көргүзүг материалдарын, үениң негелдезиниң аайы-биле электроннуг курлавырларны, интерактивтиг мергежилгелер болгаш өске-даа оюннарны канчаар ажыглап болурун чугаалашкан. Тыва чогаал кичээлинге Алексей Бегзин-оолдуң чогаадыкчы ажыл-чорудулгазын үстүкү класстарга өөредири, уругларның күш-ажыл кижизидилгезиниң дугайында айтырыглар база киржикчилерниң кичээнгейин хаара туткан.
Илеткелчилерге боттарының дыңнадыының түңнелинде көдүрүп турары чугула айтырыгга хамаарыштыр ону кандыг арга-биле шиитпирлеп болурун албан саналдаарын эртемденнер сүмелээн. Республикага Электроннуг өөредилге курлавырларынга хамаарыштыр чаңгыс (ниити) платформа херек, чыгдынган электроннуг курлавырларны шыгжаар сервер турар ужурлуг дээрзин эртем-практиктиг конференцияның дараазында шиитпирлээр айтырыгларының аразынче киирерин саналдаан.
