2021-2022 өөредилге чылында 1-ги класстан эгелеп ” Математика” , Хурээлел” эртемнерни тыва дылга шингээдип эгелээнинден бээр 4 дугаар түңнел чылы болуп турар.
Тыва Республиканың өөредилге яамызының Национал школа хөгжүдер институдунуң улуг методизи Тамара Ховалыг Ак-Довурактың ” Өлчей” аттыг лицейинге, Чадаана хоорайның Вера Байлак аттыг 4 дугаар школазынга база Сүт-Хөл кожууннуң Алдан-Маадыр, Өвүр кожууннуң Хандагайты ортумак школаларынга барып четкилээн.
“Тыва дыл”, “Литературлуг номчулга”, ” Математика” база ” Хурээлел” эртемнеринге өөреникчилерниң сонуургалын бедидери-биле уругларның билиглеринге даянган оюн хевирлиг онаалгаларлыг, өөредиглиг болгаш кижизидикчи ужур-утказы бедик кичээл-ассортини тыва дыл кырынга барган класстарынга эрттирген.
Уругларның тыва дылга эртемнерни билип ап турары эки, оларның тыва дылга сөс курлавыры байлак дээрзин демдеглээн.
Ук школаларның башкылары Ольга Кызыл-ооловна Куулар, Саира Артуровна Дажы-Сегбе, Урана Отук-ооловна Ооржак, Сайзана Станиславовна Куулар эге школага эртемнерни тыва дылга өөредири чогумчалыг дээрзин чугулалап, төлевилелди эки эгелээшкин деп санап турарлар.