Ондар Конгар-оол аттыг тыва үндезин культура төвүнге Тываның Улустуң башкызы, педагогика эртемнериниң кандидады Алевтина Сугдуровна ШААЛЫНЫҢ 70 харлаарынга уткуштур ооң бөлүк авторлар-биле бижээни «Өг-бүле педагогиказы» деп номунуң чырыкче үнгени-биле холбаштыр таныштырылгазын эрттирген.
Аңаа ТР-ниң өөредилге сайыдының оралакчызы Б.С-Б.Ондар, номнуң авторлары: А.С.Шаалы, А.К.Ооржак, С.Ч.Шулуу-Маадыр, Кызылдың 9 дугаар школазынга директорлап тургаш, улусчу педагогиканы өөредиринге ук школага курлавыр төптү тургускан Россияның алдарлыг башкызы В.Ө. Домур-оол, педагогика эртемнериниң кандидады Г.Д.Сундуй, республика школаларында ук эртемни эрттирип турар башкылар, А.С. Шаалының, кады ажылдап чораан эштери, өөреникчилери болгаш төрелдери кээп киришкен.
Өөредилге шугумунга улусчу чаңчылдарны өөредириниң талазы-биле эге базымнарны канчаар кылып турганын Анна Кыдат-ооловна Ооржак чугаалап тура, программаны тургузарда, каяа даянып турганын таныштырган. А Галина Донгаковна Сундуй бодунуң эртем талазы-биле ажылдарын эгелээринге ол үеде Шамбалыг школазының директорунуң чугаазы идиг болганын демдеглээн. Номну кылып турган үезинде ажылының дугайында авторларның таныштырганының соонда, Кызылда кадет корпуста тыва дыл болгаш чогаал башкызы, ук номну уругларга өөредип тургаш, таварышкан эскериглериниң дугайында чугаалап тургаш, өөреникчилерниң боттарының көрүжүнден бижээн өөредиглиг одуругларын чыылганнарга номчуп берген.
ТР-ниң Өөредилге яамызының Өөрүп четтиргениниң бижии-биле Алевтина Сугдуровна Шаалыны үр үеде аныяк-өскенни өөредиринге, оларның мөзү-шынарын хевирлээринге киирген үлүг-хууузу болгаш мугур харлааны-биле чергелештир тывыскан.
«Өг-бүле педагогиказы» деп өөредилге номун чырыкче үндүреринге үлүг-хуузун киирген автор болгаш ажылдакчы бүрүзүнге Национал школа хөгжүдер институттуң мурнундан өөрүп четтириишкинниң бижиктерин ук институттуң директору Е.М.Куулар тывыскан.
Ук хемчегни Тыва Республиканың Өөредилге яамызының «Национал школа хөгжүдер институдунуң» ажылдакчылары организастап эрттирген.
«Ондар К.Б. аттыг тыва улустуң ёзу-чаңчылдарының, аас чогаал болгаш ус-шеверлер төвүнүң» директору И.М. Көшкендейге, хемчегни эрттиришкен ажылдакчыларга Национал школа хөгжүдер институттуң мурнундан өөрүп четтиргенивисти илередип тур бис.
