Национал школа хөгжүдер институт Тыва Республикага 2024-2033 чылдарда тыва дылдың хөгжүлдезинге күрүне деткимчезиниң эчис сорулгаларын боттандырылгазынга хамааржыр «Сөзүглелдиң аянныг номчулгазы»деп үн бижидилгезиниң мөөрейин тыва дыл болгаш чогаал башкыларының аразынга эрттирген

Мөөрейге киржилге дээрге шылгалда болур. Бо удаада база башкылар чогаадыкчы ажылга киришкеш, боттарының профессионал деңнелин бедидип, арга-дуржулгазын эш-өөрү-биле үлежир аргалыг болганнар. Киржикчилерниң ажылынга ынаан, тура-соруктуун, сонуургалдыын, кызымаан жюри кежигүннери демдеглээн.

Мөөрейже дараазында сөзүглелдерни чоруткан: К-Э. Кудажы «Таңды кежии» деп чогаалындан үзүндү «Тоол ээлери», Т. Кушкаштың «От чаяачы», К. Аракчааның «Буянныг тал», Э. Донгактың «Тоолзуг оран» деп чогаалындан үзүндү «Кулузун-Шынаазы», Монгуш Кенин-Лопсанның «Аяк сүт», Монгуш Эргептиң «Арнынче көрүнмээн» болгаш Монгуш Кенин-Лопсан «Холу чадагай ирей». Шилиттинген чогаал үзүндүлери өөреникчилерниң назы-харынга болгаш тыва дылды билириниң деңнелинге дүүшкек, кижизидикчи салдарлыг, утка талазы-биле чараш, дыл-домаа уругларның сөс курлавырын байыдарынга таарымчалыг, кызыра бижииринге эптиг болган.

Үн бижидилгезиниң шынарының талазы-биле мөөрейниң негелдези езугаар wav форматка бижиттирген, артык шимээн-дааш чок, дикциязы тода, тыва дылда үн адалгазының аяны шын, үн доктаашкыннарын шын сагып номчаан турар ужурлуг. Аянныг номчулга күүседикчилери бо негелделерни күүсеткен, ынчалза-даа wav болгаш MP3 форматтарны деңнеп тургаш, шынары эки болган вариантыларны техниктиг специалистерниң үнелээни ёзугаар шилээн.

Мөөрейниң түңнелинде: киржилгези дээш сертификаттарны Кызыл хоорайның М.А.Бухтуев аттыг 1 дугаар школазының башкызы Ондар Алдынай Каң-ооловнага (Монгуш Кенин-Лопсан «Холу чадагай ирей»), Чеди-Хөл кожууннуң Сайлыг ортумак школазының башкызы Ховалыг Октябрина Алексеевнага, (К. Аракчааның «Буянныг тал») болгаш Таңды кожууннуң Кызыл-Арыг ортумак школазының башкызы Куулар Долаана Доржуевнага, (Т. Кушкаштың «От чаяачы») тывыскан.

1-ги черде Чаш-оол Чечена Николаевна (Э. Донгактың «Тоолзуг оран» деп чогаалындан үзүндү «Кулузун-Шынаазы»), 2-ги черде Балчый Чечен Эрес-ооловна (Монгуш Кенин-Лопсанның «Аяк сүт»), 3-кү черде Куулар Долаана Доржуевна (К-Э.Кудажы «Таңды кежии» деп чогаалындан үзүндү «Тоол ээлери») болгаш Созур-оол Айдыңмаа Хулер-ооловна (Монгуш Эргептиң «Арнынче көрүнмээн») болганнар.

Мындыг хевирлиг электроннуг өөредилге материалдары өөредилгениң шынарын бедидеринге, күрүне шылгалдаларынга өөреникчилерни белеткээр ажылга улуг ужур –дузалыг.

Киржикчилеривиске байыр чедирбишаан, бо эгелээшкинни соксатпайн, бистиң-биле кады улаштыр ажылдап, оон-даа солун сөзүглелдерни уран номчулгалары-биле бисти кайгадыр дээрзинге идегеп турар бис.

Бо аудиобижидилгелерни башкылар ажыглаар кылдыр сүмелеп тур бис.