Күр-Дагба, Салбакай Ланааларның өг-бүлези, төрел аймаа Тываның чонунга “Хымыс байырлалы” деп улуг хемчегни Тес-Хем кожууннуң Ак-Эрик сумузунда Ак-Кежиг деп чайлаанга август 28-те организастап эрттиргеннер.
Уксаалыг аъттарны азырап, кулунну тыртып, бени саап, хымыс бүдүрүлгезин эгелеп турар өг-бүле-биле Национал школа хөгжүдер институт кады ажылдажылгазын уламчылап, “Хымыс байырлалынга” аалдап четкеннер.
Байырлалдың аалчыларынга чылгычы өг-бүле белерин саап турар арга-дуржулгазын көргүскеннер. Бе саалдазы дээрге тыва улустуң шаг шаандан бээр кылып келген ажыл-ижиниң бирээзи. Бе сүдүнден кылган хымыс – эм шынарлыг, сүүзүннүг чем.
Оон аңгыда Национал школа хөгжүдер институттуң ажылдакчылары байырлыг хемчегниң мөөрей кезээнге шииткекчилеп ажылдааннар.
“Каас, чараш тыва хевим” деп мөөрейге институттуң ажылдакчылары Саая Азияна база Хомушку Чочагай шииткекчилээн.
Кожамык мөөрейин Хомушку Аңчы удуртуп, шииткекчилеп эрттирген.
Ланаалар чылгычыларның чаңчылчаан амыдыралын, малынга хүндүткелдиин болгаш күш-ажыл кижизидилгезиниң хөй-ниитиге тарадып чоруур үлегерлиг өг-бүле.
Хымыс байырлалының янзы-бүрү хемчеглерин Национал школа хөгжүдер институт өөредилге шугумунга ажыглаар сорулгалыг чыып, тырттырган.