Россия Федерациязында болгаш Тыва Республикада Ада-чурт камгалакчызының чылынга болгаш Россияның эртем хүнүнге тураскааткан «Мээӊ ачам – камгалакчы» деп мини-төлевилелдерниң муниципалдыг мөөрейи өг-бүлелерни чогаадыкчы чорукка, өг-бүлениң үнелиг чүүлдерин быжыглаарынга каттыштырган хемчег Кызыл хоорайның 27 дугаарлыг «Угулза» аттыг уруглар садынга болуп эрткен. Мөөрейни Национал школа хөгжүдер институт бедик деңнелге организастап эрттирген.
Мөөрейниң сорулгазы – ада кижиниң мөзү-шынар болгаш сүлде-сүзүүнүң күчү-күжүн алгап-мактаары, ол ышкаш өг-бүлениң чаңчылдарын болгаш үнелиг чүүлдерин нептередири. Тыва дыл өөрениринче угланган «Төрээн Тывам» деп программа-биле өөренип турар уруглар болгаш оларның өг-бүле кежигүннери – адалары, авалары, кырган-авалары, кырган-ачалары болгаш өске-даа төрелдери киришкен.
Мөөрейниң онзагай талазы – өг-бүлелерниң шупту кежигүннери: уруу, оглу, авазы, ачазы, төрелдери болгаш деткимче бөлүктерниң идепкейлиг киржилгези болган. Киржикчилер боттарының ажылдарын янзы-бүрү хевирге бараалгатканнар: лэпбуктар, видеороликтер, презентациялар дээш оон-даа өске. Өг-бүле бүрүзүнде бичии чаштар ачазының, кырган-ачазының дугайында ырлап, шүлүктеп, төөгү чугаалар чугаалааны онзаланып турар.
Өг-бүле бүрүзүнүң ажылдары бедик деңнелдиг болган. Оларның аразындан шылгарап үнген ажылдар:
1-ги черге төлептиг болган: Ооржак Бады, авазы Айлана Борисовна, ачазы Алексей Алексеевичиниң өг-бүлези (Кызылдың 11 дугаар уруглар сады);
2-ги черге төлептиг болган: Ооржак Солаңгы, авазы Айлаңмаа Семеновна, ачазы Артыш Демир-Маадыровичиниң өг-бүлези (Кызылдың 30 дугаарлыг уруглар сады);
3-кү черге төлептиг болган: Монгуш Каң-Хүлер, авазы Аюна Андреевна, ачазы Аяс Владимировичиниң өг-бүлези (Кызылдың 28 дугаар уруглар сады).
«Келир үениң камгалакчызы» деп атка төлептиг болган Ондар Алдын, авазы Ада Жоресовна, ачазы Мерген Викторовичиниң өг-бүлези (4 дугаар уруглар сады).
«Тыва дылым – чоргааралым» деп атка төлептиг болган Хомушку Уран-Хээ, авазы Айыран Казаковна, ачазы Белек Викторовичиниң өг-бүлези (17 дугаар уруглар сады) төлептиг болганнар.
Мөөрейге идепкейлиг киришкен өг-бүлелерниң хей-аъдын көдүрүп, дараазында сайгарлакчылар боттарының деткимчезин көргүзүп, чигирзиг болгаш үнелиг белектерни сөңнээнинге четтиргенивис илереттивис:
– кондитерская пекарня «Карамелька», Дирчин Урана Байыр-ооловна;
– автор пректа «Тувинские пазлы для детей и взрослых» vk.com/yuna_tamdyn , Аюшеева Сарюна Афанасьевна;
– спортивный комплекс им. Ивана Ярыгина г. Кызыла;
– мастер-резчик по дереву Маады Роман Эрес-оолович.
