Бөгүн, март 14-түң хүнүнде Мөңгүн-Тайга кожууннуң Мугур-Аксы суурда Шагаа байырлалынга тураскааткан «Өгбелерниң чечен-мергенинге өөрениили» деп школа назыны четпээн уруглар албан черлериниң башкыларының эртем-практиктиг конференциязы ажылын эгелээн. Ук конференцияга киржири-биле бүгү республикадан ниитизи-биле 180 уруглар садтарының кижизидикчи башкылары чыглып келгеннер. Ол болза Тожу, Таңды, Чеди-Хөл, Улуг-Хем, Чаа-Хөл, Өвүр, Бай-Тайга база Барыын-Хемчик кожууннарындан болгаш Кызыл хоорайдан келген башкылар болур.
Шагаа байырлалының ак айында болуп турар бо конференцияны ТР-ниң Өөредилге яамызы, Национал школа хөгжүдер институт база Мөңгүн-Тайга кожуннуң Өөредилге эргелели эрттирип турар.