Март айның башкы хүннери, 2-3-те, Национал школа хөгжүдер институттуң ажылдакчылары өөреникчилерниң тыва дылды кайы хире билириниң деңнелин тодарадыр сорулга-биле Улуг-Хем кожууннуң Шагаан-Арыг хоорайның дугаары 2 школазынга, «Ручеек» аттыг уруглар садынга, Тываның тудуг техникумунуң Шагаан-Арыгда салбырынга база Чаа-Хөл кожууннуң Ш. Ч. Сат аттыг школазынга, «Чодураа» аттыг уруглар садынга Альбина Монгуш, Азияна Саая, Любовь Мигир-оол, Регина Монгуш план аайы-биле үнүүшкүннү кылганнар

Шагаан-Арыгның уруглар садының бичии бөлүктеринден эгелээш улуг бөлүктеринге чедир чаштары тыва дылынга тергиин чугаалаар болганнар. Олар «Чаңгыс дыл – чаңгыс кижизидикчи башкы» деп принципти боттандырып турар уруглар садтарының бирээзи. Чаа-Хөл кожууннуң чаштары барган аалчыларны тыва дылынга хостуг болгаш байлак чугааланыры-биле кайгатканнар. «Чодураа» аттыг уруглар садының бичии чаштары улустуң аас чогаалының биче хевирлери: үлегер домак, узун-тыныш, дүрген-чугаа, кожамыкка тура дүшпес болганнар.

Ш. Ч. Сат аттыг Чаа-Хөл школазының өөреникчилери кожуунунуң чараш билдингир черлериниң дугайында билдилиг тайылбырлап, барган башкыларны кайгатканнар. Ниитизи-биле алырга, үнүүшкүнче барган башкылар уругларның тыва дылда сөс курлавыры эки деп түңнээн.