2025 чылдың апрель 8-те республиканың кижизидикчи башкыларының баштайгылары уругларның аас чугаазын сайзырадыр эң тергиин арга-дуржулгаларын көргүзери-биле янзы-бүрү темаларлыг кичээлдерни эрттирген. Оларның аразында: “Тыва чоннуң азырал амытаннары”, “Тыва чоннуң национал оюннары”, “Мээң өг-бүлем”, “Бис спортка ынак бис”, “Тыва идик-хеп дугайында”, “Черлик амытаннар”.
Уруглар садының улуг болгаш белеткел бөлүктериниң чаштары кичээлдерге аажок идепкейлиг киришкеннер. Олар келген аалчыларны улуг бергедээшкин чокка хүлээп алганнар.
Кичээлдеринде тыва дылды башкылаарының чаа арга-методтары, солун эгелээшкиннер, ажыдыышкыннар бары өөрүнчүг болган.
Амдыызында чүгле 7 киржикчи көргүскен-даа болза кижизидикчи башкыларның ниити белеткели шыырак, арга-дуржулгазы байлак деп чүүл илереттинген.
Апрель 9-та дараазында 6 киржикчи “Тоол оранынче аян-чорук”, “Мергежилдер дугайында”, “Чеди чүзүн өң”, “Тыва чоннуң ак чеми”, “Тыва уруглар чогаалчылары”, “Тыва чоннуң тоолдары” деп темаларга кичээлдерин эрттирер. Мөөрейниң киржикчилеринге чедиишкиннерни күзеп, чымыштыг ажыл-ижиниң түңнели болур тиилелгелиг болурун күзедивис.