Президент Владимир Путинниң чарлааны-биле Россияда Эртем болгаш техника декадазы ёзугаар форум чылдың-на болуп эрттип турар. Бо чылын ноябрь 21-де республиканың найысылалы Кызыл хоорайга болуп эрткен. Шуулганга Тывада эртем организациялары болгаш өөредилге албан черлери, ол ышкаш бизнестиң болгаш аңгы-аңгы бүдүрүлгелерниң төлээлери чыылган. Хемчегге Чадаана хоорайның «Хээлер» уруглар сады боттарының эртем оруунче бирги базымнары-биле киришкен. Ук уруглар сады Национал школа хөгжүдер институт-биле 2025-2026 өөредилге чылында «Эртем – чаштарга» деп губернатор төлевилелин боттандырарынга дугуржулганы кылганнар. Төлевилелде 3 хардан 7 харга чедир чаштар кижизидикчи башкылары болгаш ада-иелери-биле хаара туттунган. Ону боттандырарда, кылып чорудар ажылдарның даңзызы ёзугаар янзы-бүрү хемчеглерни эрттирген. Оларның бирээзи «Авам, ачам, мен база эртем» деп мөөрей көскү черни ээлеп турар. Мөөрейде чаш ажы-төл сонуургалдыы-биле эртем оруунче ада-иелери-биле шымнып киргеннер.
Чаштарның улуг сонуургал-биле кылган дуржулгаларын уруглар садының башкылары бичии номчугаштар кылдыр үндүрген. Төлевилелди боттандырарда кылып чоруттунар план ёзугаар Национал школа хөгжүдер институт ук номчугаштарның санын көвүдедир парлаар ажылды чорудар.
«Хээлер» уруглар сады 2025-2026 өөредилге чылында «Чаңгыс дыл – чаңгыс кижизидикчи башкы» деп принцип-биле ажылдаар 8 эксперименталдыг шөлчүгештер санынче база кирген. Ынчангаш, уруглар садының ажылдары орус болгаш тыва дылдарда чоруттунуп турары чаштарның эртемче оруунда чугула черни ээлеп турар.
«Хээлер» уруглар садының удуртукчузу Ульяна Шыырап болгаш демниг ажылдап чоруур коллективинге бедиктерже ам-даа үндүр ажылдаарын, уруглар садының эрттирип турар хемчеглеринге кижизиттирикчилери болгаш ада-иелери ам-даа сонуургалдыг киржирин Национал школа хөгжүдер институттуң мурнундан күзедивис.
Уругларның эртем оруунче баштайгы базым болган ажылдары-биле «Хээлер» уруглар садының шөлүлгезинден таныжып болур: vk.com/public217305271