Амыдыралывыста эң-не эргим, чаптанчыг, чараш кижилеривис – бичии чаштар, ажы-төлүвүс. Олар – бистиң чуртувустуң келир үези.
Национал школа хөгжүдер институттуң ажылдакчылары Национал музейниң өөнүң чанынга чаштар хүнүнге тураскаадып, тыва улустуң оюннарын ойнаткан.
Оюннарга киржип келген уруглар ада-иелери-биле чижип, кажыктың аът чарыштырар хевирин идепкейлиг ойнааннар. Кажык – тыва чоннуң шаандан тура адааннажып ойнаар, солун, чараш оюннарының бирээзи. Бистиң ада-өгбелеривистен дамчып келген кажык оюну бичии салгалдарны кижизидеринге, оларның угаан-медерелин, холунуң шимчээшкинин сайзырадырынга ужур-дузалыг.
Эрткен чылга бодаарга бо чылын хемчегге хөй кижи киришкен. Ниитизи-биле 57 уруглар, оолдар идепкейлиг ойнааннар. Киржикчилерниң аразында эрткен чылдарда киржип турган ойнакчылар кээп турарын демдеглексенчиг. Сөөлгү үеде ажы-төлдүң, ада-иелерниң-даа тыва оюннарга сонуургалы оттуп турары ɵɵрүнчүг.
Чаштар – бистиң келир үевис! Бүгү делегейде биче сеткилдиг, чырык херелдиг чаштарның байырлалы таварыштыр аас-кежикти, чедиишкинниг өөредилгени база күзелдери кезээ шагда бүдүп чоруурун күзедивис!