Курска дыңнакчылар Тываның барык бүгү булуңнарындан – эң ырак кожууннарындан: Мөңгүн-Тайганың Кызыл-Хаядан, Кунгуртугдан, Өвүрден, Бии-Хемниң Хүттен безин башкылар кээп өөренгеннер. Хоочун, арга-дуржулгазы улуг башкылар өөренип кээп турары база өөрүнчүг. Курстарже чалаткан лекторларывыс филология эртемнериниң кандидады Саая Оюмаа, «Билиг» деп российжи ниитилелдиң лектору Ичин-Норбу Любовь болгаш «Сайзырал» төвүнүң психологу Наваждай Ай-Даштың номчаан материалдары дыңнакчыларны сорук киирген болгаш оларның профессионалдыг өзүлдезинге деткимче болган.
Боттарының хуузунда арга-дуржулгазын дээди категорияның тыва дыл болгаш чогаал башкылары В.Б. Кара-Сал аттыг Тээли ортумак школазындан Ондар Ангелина чогаадыглар бижидерин, Самагалдайның 2 дугаар ортумак школазындан Тирчин Анджела эдертиглер бижидер арга-дуржулгазын дыңнакчыларга таныштырган.
Кол лектор Сарыглар Чечек хыналда ажылдарның тургузуун, шылгалдага өөреникчилерниң ажылдарын үнелээриниң системазын болгаш ККШ-ны чедиишкинниг дужаадырынга башкыга эргежок чугула аргаларны тодарадып таныштырган. Чечек Алдын-ооловна курсту доозуп тура, башкыларның билиглерин быжыглап, солун даалгаларны бөлүү-биле күүседип тургаш, түңнээр арганы тургускан.
Уруглар чогаалчызы Александр Шоюн-биле база солун ужуражылга эрткен. Ол автономнуг коммерциялыг эвес уруглар парлалгазының бажыңы «Алдын Эртине» деп организацияны тургузуп алганын чугаалааш, уругларга тааржыр янзы-бүрү хемчээлдиг, өңгүр чараш чурук каасталгаларлыг, номчуурунга болгаш ап чоруурунга эптиг орус болгаш тыва дылдарда бижиттинген номнарын таныштырган.
Өөредилгеге келген башкылар курсту солун болгаш ажыктыг болган деп үнелээн.
Материалды, фоточуруктарны Салчак А.К. белеткээн
