Тываның күрүне университединде литературлуг музейге Тываның Улустуң чогаалчызы Мария Амын-ооловна Күжүгеттиң чырык адын мөңгежидип арттырар дээн байырлыг хемчегге национал школа хөгжүдер институттуң ажылдакчылары киржип, институттуң мурнундан филология лабораториязының эртем ажылдакчызы Аңчы Хомушку байырлыг сөстү чедирген. Аңаа Мария Амын-ооловна Күжүгеттиң дээди өөредилге черинге башкылаашкын ажылы, чогаадыкчы ажылындан аңгыда, ортумак өөредилге черинге өөредилге-методиктиг комплектилер кылчып ажылдап чораанын онзалап демдеглээн. Ол национал школа хөгжүдер институтка дакпырлап ажылдап, «Төрээн (тыва) чогаал» эртеминиң федералдыг ажылчын программазын ажылдап кылган, өөредилгениң федералдыг күрүне стандартының негелделеринге дүүштүр тургускан 5, 6 класстарга «Төрээн чогаал», 8 база 9 класстарга «Тыва чогаал» номнарын бижээн бөлүк авторларның бирээзи болуп ажылдап чораан. Мария Күжүгеттиң бедик утка-шынарлыг чогаалдары өөредилге программазынга кирип, өөреникчилерге тыва чогаал, ёзу-чаңчылдар-биле таныжар арганы берип турар. Улустуң чогаалчызының адын эдилээн литературлуг музейге институт бодунуң үндүрген номнарын белек кылдыр сөңнээн.
Тыва уругларның төрээн дылынга өөренир эргезин хандырар албан черинде башкының сургуулдары, соон изээн салгакчылары – «сорунзажылар» Шончалай Мааты-оол, Кежик Коңзай; чогаал бижип чоруур авторлар Эрик Доңгак, Чойгана Сарыглар; методистер Альбина Монгуш, Аянмаа Салчак, Чочагай Хомушку, Азияна Саая, Аңчы Хомушку болгаш өскелер-даа ажылдап чоруурлар.
