Национал школа хөгжүдер институттуң хөй кижи составтыг десантызы Тывавыстың ырак-узак булуңнарының бирээзи – Мөңгүн-Тайга кожуунда сургакчылап чоруп турар. Ажылчын сургакчылаашкынның сорулгаларының бирээзи – кожууннуң башкыларынга методиктиг семинарны апрель 16-да Мугур-Аксының 1 дугаар школазының оран-савазынга эрттиргеннер.
Институттуң директору, филология эртемнериниң кандидады Елена Мандан-ооловна Куулар Россия Федерациязында национал дылдар, оларның аразында тыва дыл башкылаашкынының чаа стандартарының дугайында чугаалаан. Улуг методист Аянмаа Салчак өг-бүлениң ук-ызыгуур ыяжын тургузарының методиказы-биле таныштырган. Улуг методистер Альбина Моңгуш биле Айдисмаа Тюлюш уруглар садтарында “Чаңгыс дыл – чаңгыс кижизидикчи башкы” деп принциптиң ажыл-чорудулгазы, дидактиктиг материалдарның ажыглалының дугайында илеткелдерин башкылар өөрүп дыңнааннар. Эртем ажылдакчылары Аңчы Хомушку, Чочагай Хомушку олар тоолдажыр, төөгүлежир чаңчыл база тыва маадырлыг тоолдарда кыс кижиниң овур-хевириниң дугайында илеткээннер. Эртем ажылдакчызы Начын Моңгуштуң чаңчылчаан культура болгаш виртуалдыг делегей дугайында илеткелин дыңнакчылар онза сонуургаан.
Илеткелдерни дыңнакчылар сонуургап дыңнааш, айтырыглар салып, санал-оналын немээннер. Кожууннуң башкылары мындыг хевирлиг үнүүшкүннүг семинарның ажыктыын демдеглеп, четтиргенин илереткеннер. Түңнелинде дыңнакчыларга 8 шактың сертификаттарын тывыскан.