Георгий лентазы – Ада-чурттуң Улуг дайынында фашизмни тиилээн, сеткил-соруу өшпээн чоннуң сүлдезин илереткен эң билдингир демдек. Ооң төөгүзү XVIII чүс чылда-ла эгелээн. 1769 чылда тулчуушкуннарга эрес-дидим чоруун көргүскен дайынчыларны Екатерина II император Ыдыктыг Георгий ордени-биле шаңнап турган. Георгий лентазы ийи өңнүг: кара өң – дары ыжын, кызыл-сарыг өң дайын өртүнүң чалбыыжын илередип турар.
1943 чылда Алдар орденин болгаш Тиилелгениң медалынга Георгий лентазын ажыглап эгелээн.
Амгы үеде чыл санында эртип турар «Георгий лентазы» деп акция 2005 чылдан эгезин алган. Оон бээр Георгий лентазы чүгле маадырлыг өгбелеривисти сактып тураскаадыр демдек эвес, а Совет Эвилелиниң болгаш Россия Федерациязының Маадырларын, тайбың амыдырал дээш амы-тынын харам чокка берген бүгү дайынчыларга сактыышкын-мөгейигниң илередии болур.
Георгий лентазын хөректиң чүрек дужунга кыстырар. Ол арыг болгаш бүдүн, чараш хевирлиг болур ужурлуг. Лентаны сумкага, машина-терге болгаш өске каяа-даа кадап болбас.
2022 чылдан эгелеп Россия Федерациязында Георгий лентазын дайынчы алдарның демдектеринге деңнээн. Георгий лентазын шын эвес ажыглааны дээш хоойлу ёзугаар администаративтиг торгаал азы кеземче харыысалгазын онаар.