Бо удаада Национал школа хөгжүдер институттуң эге школага өөредилге талазы-биле методизи Регина Игоревна Кызылдың 2 дугаар школазынга барып четкен.
4 “а” (башкызы Алдынай Салчак) болгаш 4 “б” (башкызы Уран Хомушку) класстарга чоруткан хыналда ажылдарның сорулгазы — ук төлевилелдиң ажыл-чорудулгазының ужур-дузазын азы математика болгаш хүрээлел эртемнерин моон соңгаар кайы дылга эрттирерге таарымчалыының дугайында шинчилелдерни чорудары. Чаңгыс кичээлдиң дургузунда уругларның 4 чыл дургузунда тыва дыл, номчулга, математика болгаш хүрээлелге ук эртемнерге даянып, бүгү-талалыг (комплекстиг) хыналданы чоруткан.
Уруглар даалганы кичээнгейлиг дыңнап алгаш, ажылдарны кылып кирипкен. Оларның арын-шырайындан берге болгаш күжениишкин херек болгу дег даалга чок болуп турарын ук методист башкы эскерип, ажылды шыңгыы чорударының талазы-биле хемчеглерни алган.
Түңнелинде уруглар бо эртемнерде билиглерни шиңгээдип алганы эки, чаңгыс-даа уруг “2” демдек чокка, хыналда ажылды эки үре-түңнелдиг күүсеткен.