2023 чылда ТР-ниң Баштыңы Владислав Ховалыг сентябрь айның 17-ниң хүнүн Тываның тугунуң хүнү кылдыр тургузар дугайында саналды ТР-ниң Дээди Хуралынче кииргеш, чүс хуу деткимчени алган.
Россияның Чурукчулар, Журналистер эвилелдериниң кежигүнү, сураглыг чурукчу Оюн-оол Доктугу оглу Сат – Тываның тугунуң дөзевилелиниң автору. 1992 чылдың сентябрь 17-де ону республиканың Дээди Соведи бадылаанын сагындыраал. Чылдың-на күстүң бо чараш үезинде Дөгээ дааның кырынга Тываның ыдык сүлдези – тукту киискидер акцияны албан-организациялар, студентилер, сургуулдар доктаамал чорудуп турар.
Кандыг-даа чурттуң сүлде демдээниң бирээзи болур тукта кирген өңнер ханы утканы илередип турар болур. Тываның тугунда база ындыг. Алдын азы сарыг өң – байлакшылдыг амыдыралды, сарыг шажын чүдүлгевисти, ак-көк өң – аяс дээрни, тайбыңны, бедик хей-аътты, ак өң – тыва чоннуң арыг-чаагай сеткилин илередип турар.