Бо шакта Тыва культура төвүнде Тыва дыл хүнүн уткуштур хоорай чергелиг «Нейросеть чокка дириг аас чогаалы» деп фестиваль-мөөрей болуп эртип турар

Мөөрейни эрттирип турар кол сорулгазы – улустуң аас чогаалын болгаш тыва дылды сайзырадып, нептередири. Бо хемчегге Национал школа хөгжүдер институттуң мурнундан директорнуң оралакчызы Чойгана Монгуш ажылдап четкен. Мөөрейге ниитизи-биле 14 хоорай школаларының бөлүктери киржип келген. Киржикчилер 6 аңгы шылгалданы эртер: таныштырылга, аас чогаалдың тергиини, өгбелеривистиң оюннары, үлегер домактар болгаш тывызыктар, дүрген чугаалар болгаш ырылар, бажыңга онаалга (шиижиткен көргүзүг). Бо шылгалдаларның түңнелинде киржикчилерниң эң-не тергииннери тодараттынар. Киржикчи бөлүктерни тыва дыл болгаш тыва чогаал башкылары бедик деңнелге белеткээнин жюри кежигүннери таныштырылга кезээнде-ле эскерип, демдеглээн.