Февраль 16-ның хүнүнде Национал школа хөгжүдер институт Чадаана хоорайның «Хээлер» аттыг уруглар сады-биле Чадаана хоорайның 3 дугаар школазынга Чөөн-Хемчик кожууннуң школа назыны четпээн өөредилге черлериниң ада-иелеринге «Эртем – чаштарга» деп губернатор төлевилелиниң чорудуу-биле «Бистиң ажы-төлүвүс – төрээн черивистиң шинчилекчилери» деп мастер-классты эрттирген.
Ужуражылганың кол сорулгазы – ада-иелерни уруглары-биле кады шинчилел болгаш чурт-шинчилел ажылынче хаара тудары. Бичии уруглар улуг төлевилелдерни канчаар боттандырарын база чаңчылчаан сагыш-сеткил-мөзү-шынар үнелиг чүүлдеринге даянып, чогаадыкчы идепкейлерни организастаарын чугаалашкан.
Ук хемчегниң спикерлери: НШХИ-ниң тыва филология лабораториязының эргелекчизи Альбина Монгуш «Бистиң уругларывыс – шинчилекчилер» деп темалыг, уругларның шинчилел арга-мергежилин сайзырадырынче угланган арга-дуржулгазын болгаш методикаларын үлешкен. Начын Монгуш, НШХИ-ниң өөредилгениң этнокультурлуг талазын шинчилээр лабораториязының улуг методизи «Эртем – чаштарга» деп темалыг, уругларны шинчилел ажылынче бичиизинден-не хаара тударының чугулазын онзалап демдеглээн; Чойганмаа Сат, «Хээлер» уруглар садының педагог-психологу «Ада-иелер-биле демнежилге ажылдарының хевирлери» деп темалыг илеткелди кылган.
Мастер-класс үезинде уругларның шинчилел ажыл-чорудулгазын организастаарынга ажыглап болур янзы-бүрү аргалар болгаш херекселдер дугайында ада-иелер билип алган. Ужуражылга чугула айтырыгларны сайгарып киржикчилерниң аразында арга-дуржулга солчулгазы-биле доозулган. Ада-иелер специалистерге айтырыгларны салып, сонуургаан темаларынга хамаарыштыр тус-тузунда сүмелерни алыр аргалыг болганнар. Хемчегге кожууннуң аңгы-аңгы уруглар садтарындан 32 ада-ие киришкен.