Ук мөөрейниң иштинче кирип турар “Тыва дыл болгаш чогаалдың тергиин башкызы” база “Школа назыны четпээн уругларның төрээн дылын сайзырадырынга шылгараан практик башкы” деп номинацияларны Национал школа хөгжүдер институт (НШХИ) организастап эрттирген.
Баштайгызынга 16, ийигизинге 13 башкы арга-дуржулгазын көргүзүп, уругларга кичээлдерни эрттиргеннер. Башкы кижиниң ажыл-ижи чымыштыг дээрзин база катап бадыткап, башкылар барык бир неделя дургузунда шииткекчилер мурнунга кичээлдер, мастер-класстар эрттирип, чогаадыг-эссе бижип, билдилиг ажылдааннар. Мөөрей эгелээр мурнунда-ла белеткенип, кожуун, хоорай чергелиг чадазынга тиилеп, республикага төлептиг киржип келген башкыларга мактал сөстер сөглевестиң аргазы чок!
Киржикчи бүрүзүнүң ажылын үнелеп, демдеглевишаан, жюри кежигүннери түңнелдерни үндүрген
“Тергиин дээн төрээн дыл, чогаал башкызы” деп номинацияга:
1-ги чер – Уйнуколова Сай-Суу Начын-ооловна, Балгазын школазының тыва дыл, чогаал башкызы;
2-ги чер – Хомушку Чечек Сергеевна, Тоора-Хем школазының эге класстар башкызы;
3-кү чер – Монгуш Шончалай Тимофеевна, Чадаана хоорайның 4 дугаар школазының эге класстар башкызы алганнар.
“Тергиин кичээл” – Тюлюш Анай-Хаак Владимировна, Кызылдың 17 дугаар школазының эге класстар башкызы база “Эге класстарның тергиин башкызы” – Минчей Олча Белек-ооловна, Самагалтайның 1 дугаар школазының эге класстар башкызы олар шылгарааннар. Үстүнде адаттынган ийи башкы тус-тузунда тускай шаңналдарга төлептиг болганнар.
“Школа назыны четпээн уругларның төрээн дылын сайзырадырынга шылгараан практик башкылар” деп номинацияга:
1-ги чер – Хертек Сайсуу Сарыг-Тарааевна, Чөөн-Хемчиктиң “Малышок” уруглар садының кижизидикчи башкызы;
2-ги чер – Коданмай Олча Коминаевна, Самагалтайның “Челээш” уруглар садының кижизидикчи башкызы;
3-кү чер – Хомушку Чодураа Николаевна, Кызыл-Мажалыктың “Аяс” уруглар садының кижизидикчи башкызы шылгарап үнгеннер.
Шаңнал алган болгаш бүгү-ле киришкен башкыларга, кижизидикчи башкыларга база катап байыр чедирип тур бис!
Үстүнде ийи номинацияның тиилекчилери Тываны төлээлеп, Бүгү Россия чергелиг мөөрейге киржир эргени чаалап алганнар! Эр-хейлер!