Февраль 7-ниң хүнүнде Улуг-Хем кожууннуң төвү Шагаан-Арыгда «Азия төвүнде көшкүн чоннарның парыгы» аттыг комплекске «Авамның хуулгаазын аптаразы» деп практиктиг семинар болуп эрткен. Аңаа Улуг-Хем, Каа-Хем, Чаа-Хөл кожууннарның уруглар садтарының удуртукчулары, кижизидикчи башкылары болгаш тыва дыл башкылары арга-дуржулга солчуп, бурунгаар көрүштүг кады ажылдаар сорулганы мурнунга салып алганнар.
Семинарның кол сорулгазы – өөредилге организацияларының башкылары биле культура ажылдакчылары демнежип алгаш, тыва чоннуң ёзулалдарын, чаңчылдарын уругларга дамчыдып, өөретпишаан, оларның билип алган чүүлдерин хүн-бүрүде амыдыралга ажыглаарын чедип ажыры болур.
Хемчег үезинде семинарның киржикчилериниң илеткелдерин чыылган башкылар улуг сонуургал биле дыңнааннар. Чүлге ол бүгүнү боттуг амыдыралга ажыглап билирин чедип алыр ужурлуг бис деп түңнелге келгеннер.
Ук практиктиг семинарга Национал школа хөгжүдер институттуң улуг методистери Снежанна Ондар, Альбина Монгуш база Аюна Седен киришкен. Ниитизи-биле өөредиглиг семинарның дыңнакчыларының саны 45 кижи болган. Дараазында шак мындыг темалыг семинар Каа-Хем кожуунга февраль 28-те болуп эртер.
