Национал школа хөгжүдер институттуң, «Баштайгыларның шимчээшкини» деп уругларның болгаш аныяктарның хөй-ниити шимчээшкининиң база Тыва Республиканың Чогаалчылар эвилелиниң эрттирип турары «Аныяк шүлүкчү» деп республика чергелиг мөөрейниң түңнелдерин таныштырдывыс.
Бо чылын «Аныяк шүлүкчү» мөөрейин Өг-бүле чылынга болгаш Тываның Улустуң чогаалчызы С.С. Сүрүң-оолдуң 100 хар оюнга тураскаадып, «Поэзия» болгаш «Проза» деп ийи аңгы номинациялыг кылдыр эрттирген. Үш дугаар эртип турар мөөрейниң киржикчилериниң саны бо чылын, эрткен чылга деңнээрге, эвээш болган. Бо удаа мөөрейге республиканың аңгы-аңгы кожууннарындан ниитизи-биле 54 элээди болгаш аныяк назылыг шүлүкчүлер киришкен. Киржикчилерниң ажылдарын үнелеп көргеш, жюри кежигүннери дараазында түңнелдерни үндүрген.
«Проза» номинациязынга бирги черни Өвүр кожууннуң Чаа-Суур ортумак школазының өөреникчизи Менди Тюлюш чаалап алган. Ийиги шаңналдыг черге Чаа-Хөл кожууннуң Ак-Туруг ортумак школазының өөреникчизи Алдын-Сай Зотова төлептиг болган. Үшкү черни Тожу кожууннуң Ийниң кадыкшылга школа-интернадының 8-ки клазының өөреникчизи Алдар Ак ээлээн.
«Поэзия» номинациязы. 5-8 класстар аразынга бирги черни ТР-ниң Аграрлыг лицейиниң 6-гы клазының өөреникчизи Алдын-Сай Куулар чаалап алган. Ийиги черге Сүт-Хөл кожууннуң Алдан-Маадыр ортумак школазының 8-ки клазының өөреникчизи Сай-Хоо Ооржак төлептиг болган. Үшкү шаңналдыг черни Кызыл кожууннуң Каа-Хем суурнуң 2 дугаар школазының 7-ги клазының өөреникчизи Айдаш Кара-оол ээлээн.
«Поэзия» номинациязы. 9-11 класстар аразынга бирги черни Чаа-Хөл кожууннуң Ак-Туруг ортумак школазының 9-ку клазының өөреникчизи Милана Монгуш чаалап алган. Ийиги черге Кызылдың 2 дугаар школазының 10 а клазының өөреникчизи Алдын-Сай Донгак төлептиг болган. Үшкү шаңналдыг черни Кызылдың 11 дугаар школазының 11-ги клазының өөреникчизи Арина Монгуш ээлээн.
Республика чергелиг «Аныяк шүлүкчү» мөөрейниң бүгү киржикчилеринге болгаш тиилекчилеринге, оларны белеткээн дагдыныкчы башкыларынга байыр чедирбишаан, моон-даа соңгаар чогаадыкчы чедиишкиннерни сеткиливис ханызындан күзедивис! Шаңналдар тыпсыр черни болгаш хүннү тодарадып алгаш, немей медээлептеривисти дыңнадып тур бис. Ужурашкыже менди-чаагай!