Ол кожуун, республика болгаш Россия чергелиг «Ада-чурт» деп темалыг эртем-практиктиг конференцияның шаңналының эдилекчизи.
Удуртукчу башкызы – Айлан Дас-ооловна Осурбай.
Башкым
Арат чоннуң ажы-төлүн
Айтып, сургап өөреткен
Улус-чонга хүндүткелдиг,
Угаангыр-ла эргим башкым.
Эртенниң-не менди солчуп,
Ээлдек чаңныг уткуп алыр,
Эрес-кежээ, чазык-чараш,
Эргим ынак мээң башкым.
Улугларны, уругларны
Угаадыглыг чагып сургаар,
Эртем-биле чүглендирер
Эң-не эргим ынак башкым.
Өөредилгээ, ажыл-ишке
Өскелерге үлегерлиг,
Даады-ла сургап чоруур
Дагдыныкчы улуг башкым.
Ай дег, хүн дег чырык, чылыг
Ачы-буян өргүп чоруур,
Авам ышкаш хүндүлээрим,
Ажыл-ишчи мээң башкым.
Амыр-тайбың делгерезин!
Азия диптиң төвү болур
Ак-көк Тыва чуртувуска
Аас-кежик бүргей алган
Амыр-тайбың делгерезин!
Чамбы дипти эргий чурттаан
Чаштар үнү чаңгыланган,
Чаяаттынган чуртувуска
Чараш тайбың делгерезин!
Оран-чурттуң делгеминге
Оолдар, кыстар ойнап-хөглеп,
Айыраң каас чечек ышкаш,
Амыр-тайбың делгерезин!
Алдын хүнүм хүннеп турзун!
Ак-көк дээрим аяс турзун!
Арат-чонум, бичии чаштар
Амыр-тайбың чурттаар болзун!
