Тыва чогаалдың төөгүзүнде билдинмес арыннар, тодаргай эвес сан-чурагайлар, долу эвес факт-барымдаалар ам-даа арбын.
Тываныӊ гуманитарлыг шинчилелдер институдунуӊ эртемденнери «Тыва литератураныӊ төөгүзүнүӊ» I томун 2013 чылда парладып үндүрген. Ында тыва чогаалдыӊ үндезин дөстерин база ТАР үезиниӊ (1921–1944) баштайгы чогаалдарын сайгарган. Оон бээр он бир чыл эртсе-даа, II томну амга дээр номчукчулар манавышаан. Тыва национал школаларныӊ программазында база 5-ки класстыӊ «Төрээн чогаал» номунда Салчак Серенниӊ «Ном биле Портфель» деп баснязы совет үеден амга чедир кирип, бодунуӊ амыдыралчы угаадыын чидирбээн.
Ынчалза-даа бо хүннерге чедир басняныӊ авторунуӊ ады, фамилиязындан (адазыныӊ ады шуут билдинмес) өске кандыг-даа медээ, портреди чок болуп келгенинден башкыларга «чажыт» автор болуп чораан. Салчак Серен Салчакович 1927 чылда ТАР-ның Барыын-Хемчик кожуунунуң Хөл сумузунга (амгы Бай-Тайга кожууннуӊ БайТал) төрүттүнген. Кызылдың Күрүнениң башкы институдунуң филология факультедин дооскан. Москвада М. Горький аттыг литература институдунга өөренип чораан.
«Салчак Серенниӊ өөнүӊ ишти Мария Сюрюновна Маный Тываныӊ В.Ш. Көк-оол аттыг хөгжүм-шии театрынга артист бооп, «Шын» солунга корректорлап ажылдап чораан. Аажок талантылыг, хөгжүм херекселдеринге тергиин ойнаар чораан. Олар ийи ажы-төлдүг: Нина биле Алеша. Салчак Серен М. Горькийниӊ «Ава» деп чогаалын тыва дылче очулдургаш, оглу Алешага тураскааткан. Ол студент чылдарында, кончуг аныяанда, аар аарааш, чок болган, Москва хоорайныӊ Ваганьков чевээнде ону орнукшуткан. Сөөлзүредир Мария Сюрюновна Леонид Борандаевич Чадамба-биле (чогаалчыныӊ өөнүӊ ишти база аныяанда чок болган, Люба, Калим, Побед-оол, Айлана – дөрт ажы-төлдүг арткан турган) салым-чолун кадып, сес ажы-төлдү өстүрүп кижизиткен. Лена биле Алик – оларныӊ өг-бүле тутканыныӊ соонда, төрүттүнген уруглары.
Кол чогаалдары:
Салчак Серен чогаал ажылын 1950 чылда эгелээн. Тыва школаларның программазында ооң «Ном биле Портфель» деп баснязын школачылар өөренип, шээжилеп турар. Ук басня эӊ баштай тыва чогаалчыларныӊ «Улуг-Хем» сеткүүлүнүӊ 6 дугаар үндүрүлгезинге 1953 чылда парлаттынган.
Оон аӊгыда ооӊ «Аӊчы-биле болган таварылга» («Случай с охотником» деп баштак чечен чугаазы «Рассказы о Туве» деп чыындыга А.Ермолаевтиӊ очулгазы-биле орус дылга үнген. М. Горькийниң «Хартыга дугайында ыр», «Буревестник дугайында ыр» деп тоолдарын тыва дылче очулдургаш, 1952 чылда тускай ном кылдыр парлаткан.
Тыва критик Доржу Сенгилович Куулар «Тувинская поэзия» деп шинчилел номунда мынчаар бижээн: «…Басня тускай жанр кылдыр Тываныӊ аас чогаалынга мооӊ мурнунда турбаан-даа болза, тыва амыдыралче кирип келгеш, дазыл-дамырын ханыладып сайзырап эгелээн. Тываларныӊ ажыл-амыдыралы шаг-төөгүден бээр аӊныыр, мал база чер ажыл-агыйы-биле сырый холбаалыг, бойдус-биле чоок, дириг амытаннарныӊ аажы-чаӊын кончуг эки билир чораан болгаш, И.А. Крыловтуӊ басняларын номчукчулар улуг сонуургал-биле хүлээп алган. Ынчангаш басня тыва литературага алачайгаар ижигип, бодунуӊ сайзыралын алган. С. Серенниӊ «Ном биле Портфель», С. Сүрүӊ-оолдуӊ «Аът биле Оор» база О.Сувакпиттиӊ «Дилги биле Адыг», «Υгү», «Хуна биле Хек» тыва чогаалда баштайгы баснялар болур. Олар басня тыва улустуӊ аас чогаалыныӊ овур-хевирлерин дамчыштыр база национал дылдыӊ уран-чечен аргалары-биле шапкын сайзырап, аныяк-өскенни кижизидеринге мөзүшынар айтырыгларын шиитпирлеп шыдаар деп бадытканнар…».
Сөөлгү үеде интернет четкилеринде «Авай» деп ырныӊ авторун Кара-кыс Мунзук деп шын эвес бижип турар апарган. Шынында ону Салчак Серен бижээн, а сураглыг композитор Александр Лаптан чараш аялганы чогааткан.
Аксым-кежиин чаяап төрээн
Авайымга алдар тудуп,
Чогаадыкчы улуг чонга
Чоргаарланып чор мен, авай.
Чогаадыкчы улуг чоннуӊ ачызында
Чоргаарланып чурттап чор мен, ынак авай.
Ажылчы чон эрге туткан,
Амыдырал байлакталган,
Хөгжүлделиг чуртувуста
Хөглүг чурттап чор мен, авай.
Чогаадыкчы улуг чоннуӊ ачызында
Чоргаарланып чурттап чор мен, ынак авай.
Аваларга сагыш амыр
Амыдырал тыпсып берген.
Ада-чуртум хостуг, тайбыӊ
Ажыл-ижин камгалаар мен.
Ажыглаан литература:
1. Чадамба Айлана. У меня всё держится на любви / «Люди Центра Азии». Т II. Кызыл, 2001. С. 351
2. Бай-Тайга – уран чүүлдүӊ кавайы. М.Н.Ооржак болгаш өскелер-даа тургускан. Эртемнептерелдиг үндүрүлге. – Кызыл, 2020. Ар. 43.
3. Д.С. Куулар. Тувинская поэзия. Очерк истории. Кызыл, 1970. – С. 94–95.
4. Аян тудаал. Ырлар чыындызы. ТывНҮЧ., Кызыл, 1980. – Ар. 56–57.
Меңги Наган-оолович ООРЖАК, Туранның №2 ортумак школазының тыва дыл болгаш чогаал башкызы.
“Башкы” сеткүүлү, №3, 2024 ч.
