Тыва дыл хүнүнге уткуштур «Үш үне» деп этнокультурлуг диктантыны Национал школа хөгжүдер институт 33 айтырыглыг тест хевиринге эрттирген. Чаңчыл болу берген диктантыже ооң «Үш үне» деп адынга дүүштүр «тыва дылым», «Тыва черим», «тыва чонум» деп үш бөлүкке хамааржыр айтырыглар кирген. Киржикчилер октябрь 23-24-те диктантыны эртер аргалыг болганнар.
Этнокультурлуг диктантыны эрттирген сорулгалары: тыва дыл, чер, чон дугайында айтырыгларны чонга сонуургадыры; чоннуң тыва дыл, чер, чон дугайында билииниң деңнелин тодарадыры;
төрээн дылын кадагалаар айтырыгже чоннуң кичээнгейин угландырары.
Диктантының ниити киржикчилерниң саны 7119 кижи болган. Оларның иштинде назы-харының аайы-биле эң улуг назылыг киржикчи 88, эң бичии киржикчи – 11 харлыг. Киржикчилерниң географиязы делгем: Тываның бүгү кожуун, хоорайларындан эгелээш Ямал-Ненец автономнуг округ, Черногорск, Санкт-Петербург, Сахалинск, Салехард, Подольск, Камчаткада Петропавловск, Сахалинск, Новосибирск, Иннополис, Североенисейск, Екатеринбург, Благовещенск, Магадан чедир чурттап чоруур чуртташтарывыс киришкен.
Бир айтырыгга шын харыы дээш 3 сан алыр, а сөөлгү, 33 дугаар айтырыгга шын харыылаза 4 сан алыр турган. Ниитизи-биле шупту айтырыгларга шын харыылаан киржикчи 100 санны алыр аргалыг турган. 10-30 баллга харыылаан киржикчилер – 526, 30-50 баллга 2550, 50-70 баллга 2408, 70-80 баллга 1278, 90-100 баллга 212 киржикчи кылган. Бедик санга харыылаан киржикчилерниң аразындан 100 санны (!) алганнар – 9 кижи. Шупту эр-хейлер! Шуптузун шын харыылаан 9 киржикчиниң даңзызын болгаш айтырыгларның шын харыыларын дараазында чырыдар бис.
Этнокультурлуг диктантының сорулгалары чедип алдынган. Тыва дыл, чер, чон дугайында айтырыгларга киржикчилерниң сонуургалы улуг, билииниң деңнели бедик деп үнелеп турар бис.