Тыва дыл хүнүнге тураскааткан «Үш үне» деп этнокультурлуг диктантыны Национал школа хөгжүдер институттуң тыва филология лабораториязының ажылдакчылары 30 айтырыгны тест хевиринге, ооң «Үш үне» деп адынга дүүштүр «Тыва дылым», «Тыва черим», «Тыва чонум» деп үш бөлүкке айтырыгларны шилип тургускаш, октябрь 24- 31 хүннеринде онлайн хевирге эрттирген.
Этнокультурлуг диктантыны эрттирген сорулгалары:
тыва дыл, чер, чон дугайында айтырыгларны чонга сонуургадыры; чоннуң тыва дыл, чер, чон дугайында билииниң деңнелин тодарадыры;
төрээн дылын кадагалаар айтырыгже чоннуң кичээнгейин угландырары.
Этнокультурлуг диктантының ниити киржикчилерниң саны 7606 кижи болган. Оларның иштинде назы-харының аайы-биле эң улуг назылыг киржикчи 89, эң бичии киржикчи – 8 харлыг.
Киржикчилерниң географиязы делгем: Абакан, Бурятия, Владивосток, Москва, Камчатка, Сахалин, Хакасия болгаш Тыва. Тываның кожуун бүрүзүнден киржикчилер бар болганы өөрүнчүг.
0-49 баллга харыылаан улустуң саны 1933 кижи,
50- 79 баллга харыылаан улустуң саны 4186 кижи,
80-89 баллга харыылаан улус 1086 кижи
477 кижи 90-99 баллга харыылаан.
Шуптузун шын кылдыр – 100 баллга – 69 кижи (Ак-Довурак-4, Бай-Тайга- 4, Барыын-Хемчик – 19, Бии-Хем-1, Каа-Хем-3, Кызыл хоорай- 7, Кызыл кожуун – 1, Мөңгүн-Тайга – 1, Өвүр – 1, Сүт-Хөл, Таңды- 7-7, Тере-Хөл-6, Улуг-Хем-3, Чаа-Хөл-1, Чеди-Хөл-1, Эрзин-1 ).
Этнокультурлуг диктантының сорулгалары чедип алдынган. Тыва дыл, чер, чон дугайында айтырыгларга киржикчилерниң сонуургалы улуг, билииниң деңнели бедик деп үнелеп тур бис. Эрткен чылын «Үш үне» деп диктантыга 4208 кижи киришкен болза, бо чылын 7606 кылдыр өскен. Тиилекчилерниң аттарын ноябрь 1-де чарлап таныштырар бис.